Edition
Ausfertigungen
Drucke
Inhalt
Kontext
Kommentar
In nomine Sacrosanctae et Individuae Trinitatis
Notum sit universis et singulis, quorum interest vel quomodo libet interesse potest. Quod deducendo ad executionem perpetui inter Serenissimos et Potentissimos Reges et Rem publicam Poloniae ab una, Electoresque Brandenburgicos in Prussia Duces ab altera, foederis inconcussum robur, firmitatemque habentia pacta, et inprimis articulum, quo disponitur, ut quotiescunque novus Rex electus fuerit aut Dux Prussiae in Ducatum successerit, idem foedus ab utraque parte renovetur confirmeturque iuramentis de super praestitis, per deputatos in animam principalium iurantes. Existente nunc casu novae in Ducatu Prussiae successionis (constitutis prius ex mutua conventione eidem actui die, locoque infra expressis) alte memoratorum tam Regiae Maiestatis quam Serenitatis Electoralis deputati plenipotentiarii, a parte quidem Regia magnificus Ottho Fridericus Felkiersamb, Palatinus Czerniecoviensis, et generosus Ioannes Bonaventura Krasinski, Referendarius Regni, Capitaneus Varsaviensis, Sztumensis, Prasnisensis. A parte vero Electorali Illustris Alexander S[acri]. R[omani]. I[mperii]. Burggravius et Comes a Dohna Serenissimi Electoris Brandenburgici Consiliarius status intimus, Morungensis et Lipstadiensis Capitaneus, et generosus Christophorus à Wichert, Serenissimi Electoris Brandenburgici Aulae et Legationum Consiliarius, praestitua die in Palatio Regio Villanoviensi ad Varsaviam companuerint, post mutuasque plenipotentiarium tabulas (quarum apographa sub finem huius instrumenti de verbo ad verbum sunt inserta) rite commutatas, sequenti tenore in animas principalium iurarunt.
Nos Ottho Fridericus, et Ioannes Bonaventura à Serenissimo et Potentissimo Principe Domino, D[omi]no Ioanne Tertio, Dei gratia Rege Poloniae, Magno Duce Lithuaniae, Russiae, Prussiae, Masoviae, Samogitiae, Livoniae, Kyioviae, Volhyniae, Podoliae, Podlachiae, Smolensiae Severiae Czerniechoviaeque ad renovationem et confirmationem pactorum, quae die 19. septemb[ris] Velaviae, tum die 6ta novembris Bidgostiae anno 1657 cum Serenissimo Principe Domino Friderico Wilhelmo Marchione Brandenburgico S[acri] R[oman]i Imp[erii]. Archicamerario et Principe Electore Prussiae, Magdeburgi, Juliae, Montium, Stetini, Pomeraniae, Cassubiorum, Vandalorumque, nec non in Silesia Crosnae et Carnoviae Duce, Burggrabio Norimbergensi, Principe Halberstadii, Mindae et Camini, Comite Marcae et Ravensbergi, Domino in Ravenstein, Lauenburg et Büttau, nomine inclyti Regni Poloniae, et Magni Ducatus Lithuaniae conclusa et stabilita, et per constiutionem omnium ordinum totius Reipublicae approbata et confirmata sunt; deputati commissarii nomine eiusdem S[acr]ae R[egi]ae Maiestatis Poloniae, eiusque successorum Regum, quandoquidem praefata pacta Sua Serenitas Electoralis per supra memoratos deputatos plenipotentiarios in instanti quoque ratihabet et iuramento confirmat. Nos ex vi specialis mandati in animam eiusdem S[acr]ae R[egi]ae Ma[iesta]tis iuramus; quod Sa[cra]. R[egi]a Maiestas praedicta pacta, in omnibus articulis, punctis et clausulis observatura sit, nec iisdem sive directe sive indirecte contraventura, aut contraveniri a subditis passura sit. Sic ipsam et Nos DEUS adiuvet, par haec Sancta DEI Evangelia Amen.
Forumla Iuramenti Deputatorum Electoralium
Nos Alexander S[acri]. R[omani]. I[mperio]. Burggravius et Comes a Dohna, et Christophorus à Wichert à Serenissimo et Potentissimo Principe ac Domino, D[omi]no Friderico Tertio Marchione Brandenburgico, S[acri] R[omani] Imp[erii]. Archi Camerario et Principe Electore Prussiae, Magdeburgi, Juliae, Cliviae, Montium, Stetini, Pomeraniae, Cassubiorum, Vandalorumque, nec non in Silesia Crosnae et Svibussae, Duce, Burggravio Norimbergensi, Principe Halberstadii, Mindae et Camini Comite de Hohenzollern, Marcae et Ravensbergi, Domino in Ravenstein, Lauenburg et Büttau, ad renovationem et confirmationem pactorum, quae die 19. septem[bris]. Velaviae, tum die 6ta novembris Bidgostiae anno 1657 cum Rege et Regno Poloniae, item cum Magno Ducatu Lithuaniae Sua Serenitas Electoralis iniit, quaeque Respublica postmodum in comitiis Regni anno 1658 sicuti quoque Serenissimus et Potentissimus Princeps ac Dominus, D[omi]nus Ioannes Tertius Rex Poloniae, Magnus Dux Lithuaniae Russiae, Prussiae, Masoviae, Samogitiae, Livoniae, Kijoviae, Volhyniae, Podoliae, Podlachiae, Smolensciae, Severiae, Czerniechoviaeque ratihabuit et confirmavit, deputati commissarii nomine Suae Serentatis Electoralis vi specialis mandati iuramus; quod sua Serenitas Electoralis praedicta pacta in omnibus articulis, punctis, et clausulis, observatura sit, nec iisdem sive directe, sive indirecte contraventura, aut contraveniri à subditis passura sit. Sic Ipsam et Nos DEUS adiuvet per haec Sancta Dei Evangelia. Amen.
Utque huius rei ad posteritatem constet memoria fidesque, duo exemplaria eiusdem tenoris confecta, manibusque ac sigillis propriis partium munita et firmata sunt.
Sequitur apographum mandatorum tam S[acr]ae R[egi]ae Maiestatis, quam Serenitatis suae Electoralis.
Ioannes Tertius Dei gratia Rex Poloniae, Magnus Dux Lithuaniae, Russiae, Prussiae, Masoviae, Samogitiae, Livoniae, Kijoviae, Volhyniae, Podoliae, Podlachiae, Smolensiae, Severiae, Czerniechoviaeque. Notum testatumque facimus per praesentes. Quod cum pactis Bidgostiensibus cautum sit, ut pacta illa, quae Nobis et Regno Poloniae ac Magno Ducatui Lithuaniae cum Serenissimo olim Principe Domino Friderico Wilhelmo Marchione Brandenburgensi, S[acri]. R[omani]. Imp[erii]. Archi camerario et Principe Electore, Prussiae, Magdeburgi, Iuliae, Cliviae, Montium, Stetini, Pomeraniae, Cassubiorum Vandalorumque, nec non in Silesia et Carnoviae Duce, Burggravio Norimbergensi, Principe Halberstadii Mindae et Camini, Comite Marcae et Ravensbergi, Domino in Ravenstein et Terrarum Lauenburg et Büttau intercesserunt. Quotiescunque novus Rex Poloniae electus fuerit, aut Dux Prussiae in Ducatum successerit, ab utraque parte renoventur et confirmentur. Iuramento de super praestito per deputatos in animam principalium iurantes. Cum itaque post obitum memorati Ser[e]n[issi]mi Electoris, Serenissimus Princeps Dominus Fridericus Tertius Marchio Brandenburgensis S[acri]. R[omani]. Imp[erii]. Archicamerarius et Princeps Elector, Prussiae Magdeburgi, Juliae, Cliviae, Montium, Stetini, Pomeraniae, Cassubiorum, Vandalorumque, nec non in Silesia Crosnae et Svibussae Dux, Burggravius Norimbergensis, Princeps Halberstadii Mindae et Camini, Comes de Hohenzollern Marcae et Ravensbergi Dominus in Ravenstein Lauenburg et Büttau, D[omi]nus cognatus et Frater Noster Charissimus in praefactum Prussiae Ducatum succedat. Nos praedictis pactis satisfaciendo, Magnifico Otthoni Friderico de Fölkiersamb Palatino Czerniechoviensi, et generoso Ioanni Bonaventurae in Krasne Krasinski, Referendario Regni, Capitaneo Nostro Varsaviensi, Sztumensi, Prasnysensi etc in mandatis dedimus, ut super memoratis pactis Bidgostiensibus iuramentum in animam Nostram praestent, atque ex altera parte per deputatos electorales praestandum audiant, et excipiant. Quem admodum praesentibus hisce ipsis iniungimus, ut mediante tali iuramento Pacta ista renovent atque confirment, eorundemque observantiam a parte nostra promittant, prout et hisce praesentibus illam facultatem et plenipotentiam praedictis deputatis nostris damus et concedimus, ratihabentes omnia, quae hac in parte iuxta pactorum tenorem acturi sunt. In cuius fidem hanc nostram plenipotentiam manu nostra subscriptam sigillo regni communiri iussimus. Datum in Palatio Nostro Villanoviensi ad Varsaviam die XXIX mensis julii anno Domini MDCLXXXVIII Regni vero Nostri XV Anno. Ioannes Rex
Locus Sigilli Stanislaus Szczuka Regens Cancell[arii]., Cap[itaneus]. Lubl[inensis].
Nos Friedericus Tertius, Dei gratia Marchio Brandenburgensis, S[acri]. R[omani]. Imp[erii]. Archi Camerarius, et Princeps Elector Prussiae, Magdeburgi, Juliae, Cliviae, Montium, Stetini, Pomeraniae, Cassubuiorum, Vandalorumque nec non in Silesia Crosnae et Svibussae Dux, Burggravius Norimbergensis, Princeps Halberstadii, Mindae et Camini, Comes de Hohenzollern, Marcae et Ravensbergi Dominus in Ravenstein Lauenburg et Büttau. Notum facimus et testatum praesentibus. Quod cum Pactis Bidgostiensibus cautum sit, ut Foedus perpetuum, quod nobis cum Serenissimo et Potenssimo Rege inclytaque Republica Poloniae, nec non Magno Ducatu Lithuaniae intercedit, quotiescunque novus Rex Poloniae electus fuerit, aut Dux Prussiae in Ducatum successerit, ab utraque parte renovetur et confirmetur, iuramento desuper praestito per deputatos in animam principalium iurantes. Nos post luctuosissima Divi parentis nostri fata et suscepta in Ducatu Nostro Prussiae rerum gubernacula praedictis pactorum legibus quam exactissime fide satisfacere cupientes, illustri et generoso Consiliariis Nostris Status Intimo, et Aulico singulariter Nobis dilectis et fidelibus Alexandro Burggravio et Comiti a Dohna, et Christophorus à Wichert mandatum dedimus, ut praestito prius iuramento super pactis à deputatis Regiis in animam Regiae suae Maiestatis iuramentum istud a parte quoque nostra in animam nostram praestent; quemadmodum praesentibus hisce ipsis iniungimus, plenamque potestatem largimur ac concedimus, ut mediante tali iuramento pacta ista renovent, confirment, eorundemque observantiam a parte nostra spondeant et promittant. Quidquoid etiam a memoratis deputatis nostris sive ab utroque sive ab uno eorum solum in hoc negotio agi concludique contigerit, id omne nos gratum, ratum et acceptum habituri sumus, eodem prorsus modo ac si nos ipsi coram illud fecissemus et egissemus. In quorum omnium fidem maiorem hasce praesentes manu nostras subscripsimus sigiloque Nostro Electorali communiri iussimus. Dabantur Coloniae ad Spream die 30 junii 1688
Fridericus Elector
Locus Sigilli Eberard Dankelman
Tandem Nos a S[acr]a R[egi]a M[aies]t[a]te Domino D[omin]o Nostro Clementissimo ad renovationem pactorum alte memoratum deputati commissarii quemadmodum circa inchoationem actus praesentis solenniter et clara voce manifestati sumus, iuramentum praestandum nihil praeiudicare Reipublicae debere, neque posse, quo minus Respublica et S[acr]a R[egi]a Ma[jes]t[as] Dominus D[omi]nus Noster Clementissimum praetensiones omnes ab non satisfactionem pactis Bidgostiensibus in non nullis articuls punctis et clausulis à Sua Serenitate Electorali mediis iis, quae in pactis exstant specificata servatis gradibus in iisdem expressis requirere possit, ita nunc praestito iuramento iterato praesenti acripto protestamur et manifestamus; quam quidem manifestationem propter memoriam et fidem maiorem circa conclusionem istius instrumenti rite inter nos commutati inseri curavimus. Vicissim nos a Ser[enissi]mo Electore Brandenburgico Domino, Domino N[ost]ro Clementissimo ad renovationem pactorum alte nominatorum deputati commissarii quemadmodum circa inchoatioem actus praesentis solenniter et clara voce remanifestati sumus. Iuramentum praestandum nihil praeiudicare debere Ser[e]n[issi]mo Electori neque posse, quo minus Sua Serenitas Electorali Dominus D[omi]nus Noster Clementissimus praetensiones omnes ob non satisfactionem pactis Bidgostiensibus in non nullis articulis punctis et clausulis a Reipublica Polona mediis iis, quae in pactis exstant specificata, servatis gradibus in iisdem expressis requirere possit, ita nunc iuramento iterato praesenti scripto protestamur et manifestmus. Quam quidem manifestationem propter memoriam et fidem maiorem, circa conclusionem istius instrumenti rite inter Nos commutati inseri curavimus. Datum in Palatio Regio Villanoviensi ad Varsaviam Die XXIX Mensis Julii Anno Domini Millesimo Sexcentesimo Octuagesimo Octavo.
Ottho Friderico de Felkiersamb Palatinus Czerniechoviensis LS
LS Alexander S[acri] R[romani] I[mperii] Burggravio et Comes de Dohna
LS Ioannes Krasinski Referendar[ius]. Regni Mat[iest]atu
LS Christophorus à Wichert
Fenster schliessen
nach oben